Reunión para consensuar os contidos do inventario forestal continuo de Galicia
Os membros das universidades de Santiago de Compostela e Vigo que están a realizar parte da investigación deste inventario e o director xeral de Planificación e Ordenación Forestal, José Luis Chan, participaron na videoxornada
A Consellería do Medio Rural (Xunta de Galicia) xunto coas universidades de Santiago de Compostela e de Vigo, organizaron conxuntamente unha videoxornada participativa dirixida ás organizacións, asociacións e departamentos que compoñen o Consello Forestal de Galicia. O obxecto da xornada foi presentar os resultados dunha enquisa elaborada pola USC e achegada aos membros do Consello no mes de abril para coñecer a súa opinión sobre o proxecto de Inventario Forestal Continuo de Galicia.
Este inventario ten dous obxectivos: facer un seguimento da cantidade e do estado das masas arboradas; e servir nunha estratexia de apoio ás decisións en materia de política forestal mediante un sistema de monitoraxe forestal continuado. Ademais, unha das recomendacións do Ditame da Comisión especial non permanente de estudo e análise das reformas da política forestal, de prevención e extinción de incendios forestais e do Plan Forestal de Galicia, foi a creación dun sistema de información e estatística forestal de Galicia. A finalidade deste sistema é poder realizar diagnoses axeitadas e servir de ferramenta para a toma de decisións de políticas públicas ou empresariais relacionadas co sector forestal.
Na reunión se analizaron as necesidades e demandas que as organizacións, asociacións e entidades involucradas no sector forestal galego a través do Consello desexan que se incorpore no inventario e cales son as alternativas técnicas para facelo posible. Finalmente, acordouse crear un grupo de traballo coas organizacións que participaron na enquisa para seguir consensuando as necesidades do futuro documento.
Enlaces a novas relacionadas:
4/06/20. A Xunta, a universidade galega e os membros do Consello Forestal de Galicia consensúan os contidos do futuro Inventario Forestal Continuo https://www.xunta.gal/notas-de-prensa/-/nova/49407/xunta-universidade-galega-membros-consello-forestal-galicia-consensuan-contidos
Inventario forestal continuo de Galicia (IFG) https://mediorural.xunta.gal/es/temas/forestal/inventario-forestal-continuo