Próximo workshop, setembro 2021 “Workshop sobre Teledetección Próxima Terrestre para Aplicacións Forestais”
Os grupos de investigación da USC PROEPLA e UXAFORES organizan un workshop que terá lugar na EPSE de Lugo os días 1-3 de setembro de 2021.

O uso de información capturada mediante sensores remotos tense establecido como unha das técnicas de referencia para a caracterización e monitorización do estado dos bosques a múltiples escalas. A forte evolución sufrida por estas tecnoloxías durante os últimos años supuxo un aumento da resolución espacial e temporal, permitindo o seu uso en aplicacións con cada vez maior nivel de detalle e a un menor custo. Un exemplo disto son as técnicas de teledetección próxima terrestre, onde a captura de información do sensor realízase dende o chan e a unhas distancias reducidas en relación ao tamaño dos obxectos a caracterizar. Na actualidade, as técnicas de teledetección afastada (aéreo transportadas e satelitais) gozan dun elevado grao de desenvolvemento que permite o seu uso operativo en numerosas aplicacións forestais. Con todo, as técnicas terrestres atópanse nun estado de desenvolvemento mais incipiente, o que limita nalgúns casos o seu uso operativo e aumenta o interese e a relevancia científica dos resultados e experiencias con estas técnicas para o uso forestal.
O Workshop sobre Teledetección Próxima Terrestre para Aplicacións Forestais ten como obxectivo expoñer os principais avances científico-técnicos destas tecnoloxías para aplicacións forestais. Atópanse dentro do ámbito deste “workshop” as técnicas baseadas en sensores láser escáner terrestre (TLS) e de localización simultánea e mapeo (SLAM), así coma dispositivos ópticos, térmicos e doutro tipo nos que a captura de datos se realice a nivel do chan.
O “workshop” terá lugar na Escola Politécnica Superior de Enxeñaría (EPSE) de Lugo da Universidade de Santiago de Compostela os días 1, 2 e 3 de setembro de 2021, e constará de sesións científico-técnicas nas que os participantes presentarán as súas contribucións mediante presentacións orais ou pósteres. Estas sesións celebraranse en horario de mañá cun formato híbrido presencial-telemático. En horario de tarde realizaranse sesións prácticas de toma de datos en campo e de procesado e análise dos mesmos no ordenador con distintas tecnoloxías (ForEstereo, TLS, LiDAR SLAM e Fotogrametría Terrestre Próxima). Estas sesións serán preferiblemente presenciais, e estarán limitadas a un número de participantes que dependerá das limitacións de aforo que, no momento da súa realización, determinen as Autoridades Sanitarias. No “workshop” participarán ademais os principais fabricantes de dispositivos de tecnoloxías de teledetección próxima con potencial para o seu uso en aplicacións forestais mediante presentacións e talleres prácticos.