Aberta a inscrición para asistir ao “Workshop sobre Teledetección Próxima Terrestre para Aplicacións Forestais”
O prazo de inscrición estará aberto ata o 22 de agosto de 2021.
Xa está aberta a inscrición para asistir ao Workshop sobre Teledetección Próxima Terrestre para Aplicacións Forestais, que terá lugar na Escola Politécnica Superior de Enxeñaría (EPSE) de Lugo da Universidade de Santiago de Compostela os días 1, 2 e 3 de setembro de 2021.
O proceso de inscrición estará aberto ata o 22 de agosto de 2021 e consistirá no cumprimento do seguinte formulario. A inscrición será de balde e é obrigatoria para todos os participantes, independentemente de que asistan en formato presencial ou telemático, ou de que participen cunha comunicación ou de oíntes.
Debido ás limitacións para a presenza derivadas da COVID-19 establecidas polas Autoridades Sanitarias, e aos eventuais cambios sobre as mesmas que puideran producirse nas datas da realización do evento, a reserva de praza para a asistencia ás partes presenciais do workshop realizarase por orde de inscrición. A inscrición para as actividades presenciais dos relatores de comunicacións orais e pósteres estará garantida.
No caso de ter que reducir aforo por situacións sobrevidas de índole sanitaria, e sempre que esta redución supoña limitar o acceso ás actividades presenciais a algún dos asistentes aos que xa lles fora comunicada a confirmación de praza, a orde de prioridade a seguir será a seguinte: 1) relatores de comunicacións (presentacións orais e pósteres); 2) asistentes non relatores que contraeran gastos non-reembolsables derivados da asistencia ao workshop; 3) estudantes de doutoramento; 4) alumnos e egresados de titulacións forestais e do medio natural, xeomática, agronomía, bioloxía e outras titulacións vinculadas coa temática do “workshop”; 5) outros interesados.
Descarga do primeiro anuncio do workshop e acceso ao formulario de inscrición